Најмалку 39 луѓе загинаа во силниот земјотрес од 6,2 степени според Рихтер кој го погоди централниот дел на Италија. Бројот на жртвите постојано се зголемува, а спасувачките екипи стравуваат дека има многу луѓе под урнатините во градот Аматриче кој е срамнет со земја. Неофицијално, италијанските медими јавуваат за 65 загинати во земјотресот. Во погодените региони се уште се чувствуваат помали потреси, а 2 600 луѓе од градот Аматриче се евакуирани од спасувачките екипи.
НОВА стапи во контакт со Анета Младеновска Олмати која живее во Перуџа на само 70 километри оддалеченост од епицентарот на земјотресот.
„ Ноќеска околу 3 и 30 часот не разбуди силен земјотрес, тоа беше нешто страшно и она што е карактеристично е што траеше многу долго. Никогаш во мојот живот не сум доживеала толку силен земјотрес, толку многу се почувствува што мебелот и зидовите во станот се поместуваа, мислевме дека секој момент ќе се урне зградата врз нас. За помалку од еден час имаше уште еден земјотрес. Среќа во несреќа е што во Перуџа нема жртви и повредени, но околните гратчиња како Аматриче, Акумоли и други мали гратчиња во регионот Умбрија се целосно уништени“, изјави во телефонскиот разговор за НОВА Младеновска Олмати.
Нема информации дали во погодениот регион на Умбрија има македонски граѓани. Во Перуџа има уште две македонски семејства кои Младеновска Олмати ги контактирала и тие се добро. Досега никој од македонската амбасада во Италија не ги контактирал.
„Никој не се јавил од амбасадата, вие сте прва што ме контактиравте“, рече Анета Младеновска Олмати, Македонка која живее и работи во градот Перуџа.
Земјотресот се случи на 140 километри североисточно од Рим. Американскиот Институт УСГС соопшти дека земјотресот го погодил градот Норча во 03:36 минути утринава. Градот Аматриче е потполно уништен, а погодени с е и Акумоли и Пескара дел Тронто. Земјотресот ги вознемири и граѓаните на Рим.
Последниот земјотрес кој се случи во Италија во 2009 та година го погоди градот Аквила беше со интензитет од 6,3 степени според Рихтеровата скала. Во земјотресот загинаа над 300 луѓе.