Македонска алијанса за европска интеграција (МАЕИ), партијата на Македонците во Албанија го осуди притворањето градоначалникот на општина Пустец на Едмонд Темелко.
Од партијата потврдуваат дека Темелко секојдневно ги извршувал работните обврски како градоначалник на општина Пустец во Република Албанија чиешто државјанство и пасош, исто така, ги поседува, но, како што велат, „никогаш не се криел, ниту бегал, туку редовно се јавувал секоја среда, прво во Основниот суд Скопје 1, а потоа во Основниот суд Ресен, во согласност со претходно утврдените мерки на претпазливост при што му беше одземен само македонскиот пасош“.
МАЕИ укажува дека иако Специјалното јавно обвинителство и Основниот суд Скопје 1 знаеја дека Темелко е државјанин и на Република Албанија, никогаш не му беше изречена мерка на претпазливост за забрана да ја напушта територијата на Република Македонија.
За оваа партија приведувањето на Едмонд Темелко претставува “навреда за сите Македонци во Република Албанија и е дел од оркестрираната асимилација од албанската држава и бугарската пропаганда“.
Тие бараат претседателот на Република Македонија веднаш да го помилува Едмонд Темелко поради неговата нарушена здравствена состојба.
МАЕИ смета дека се работи за политичка хајка против единствениот градоначалник Македонец на само една општина во Албанија.
Едмонд Темелко беше уапсен вчеравечер во Скопје под обвинение за изборни нерегуларности за локалните избори во Република Македонија во 2013 година, во случајот Титаник на СЈО.