Во услови на глобална пандемија на ковид-19 која го парализира светот и нормалниот начин на живот, вклучително и спортот, имунитет задржа Македонската е-спорт федерација која, речиси, непречено продолжува со планираните активности во време на рестриктивно движење и совршено се вклопува во основната препорака на здравствените власти во земјата и на Светската здравствена организација (СЗО) – „остани дома“.

 

Од македонската е-спорт федерација во периодот што следува ќе организираат турнири во три е-спорт дисциплини и најавуваат возбудливи натпревари во Counter Strike: Global Offensive, League Of Legends и ProEvolution Soccer 2020. Пресметките се закажани на 4 мај и на 5 мај за тимските игри и на 7 мај за PES 2020.

Фото: mesf.mk

Турнирите во организација на МеСФ се под мотото #StayHome и ќе биде квалификациски за учество на првиот Европски куп на нации, кој ќе започне на Денот на Европа – 9 мај. Ривали на македонските претставници за првата континентална титула ќе бидат победниците на националните натпревари во Португалија, во Чешка, во Србија, во Словачка, во Белгија, во Израел, во Белорусија, во Унгарија, во Србија, во Украина и во Грузија.

„Светската здравствена организација препорача да се играат игри за време на пандемијата, но препораките одат во насока на умерено играње. Ние, како Федерација, секогаш предупредуваме дека вкупното време кое се минува пред компјутер да биде посветено на физичка активност. Исто така, правилните тренинзи и обуката може да донесат подобри резултати отколку неконтролираното играње со часови без прекин. Во овој двомесечен период, е-спортот е единствен спорт кој активно се одвива и се повеќе се практикува“, велат организаторите.

Македонската е-спорт федерација е формирана во 2009 година и членка е на Меѓународната е-спорт федерација, на Европската е-спорт федерација и на Светскиот конзорциум за е-спорт. Македонски е-спорт репрезенти досега учествуваа на 10 светски првенства и веќе петта година се организира Национална е-спорт лига во Македонија.