Отворањето на Македонскиот културен центар во Благоевград, Бугарија, ќе се случи до крајот на годинава, рече портпаролот на Владата Душко Арсовски одговарајќи на новинарско прашање на денешната прес-конференција. Овој вид на културен центар го најави премиерот Димитар Ковачевски, како одговор на жестоките реакции што се појавија во јавноста по повод отварањето на бугарскиот културен клуб во Битола што го носи името на Ванчо Михајлов.
Арсовски рече и дека се уште се „собираат информации“ за регистрирањето на здружението „Иван Михајлов“ во Македонија, преку кое е отворен бугарскиот културен клуб во Битола. „Владата се уште собира информации за околностите под кои е регистрирано здружението, се разгледуваат повеќе опции, и кога ќе имаме информација ќе ја споделиме со јавноста“, рече Арсовски, на прашањето што е преземено околу ова жешко политичко прашање. (С.К.)