Заменик-министерот за животна средина и просторно планирање, Јани Макрадули денеска изјави дека се додека „Југохром“ не ги исполни условите и не се вложи во заштитата на животната средина комбинатот не треба да работи.
– Инвеститорот си презеде свои обврски и за жал доцнат со исполнувањето на тие обврски. Ние сме решени се додека не се исполнат тие услови за дозволата што ја имаат, Југохром да не може да работи, рече Макрадули одговарајќи на новинарски прашање за време на акцијата за чистење на езерото Козјак.
Од Министерството за животна средина и просторно планирање контактирале со менаџментот на „Југохром“ и чекаат да бидат информирани за она што е направено како инвестиција, а потоа ќе се оцени дали ги задоволува критериумите.
Макрадули рече дека не разговарале за нови рокови за изградба на филтрите иако минатата година беше најавено дека „Југохром“ ќе почне со работа до почетокот на јуни оваа година.
Вицепремиерот за економски прашања Кочо Анѓушев, претставникот на „Југохром“, Васко Скендеровски и Бајрам Амити, од Синдикатот на вработените во фабриката кон средината на октомври, минатата година потпишаа Меморандум за разбирање за да, како што беше кажано тогаш, се овозможи оваа фабрика да продолжи да работи.
– Фабриката ќе продолжи да работи, сопственикот ќе инвестира во системот за отпрашување, односно поставување филтри, а Владата се обврзува да ги сервисира побрзо административните процедури, а работниците добиваат сигурност дека ќе продолжат да работат, рече тогаш Анѓушев.
Скендеровски изјави дека гарантира оти „Југохром“ нема да работи без филтри и најави дека тие етапно ќе се поставуваат.
Инвестицијата за системот за отпрашување е проценета на 12 милиони евра, а само за печките 7 и 8 таа изнесува 4,5 милиони евра.
„Југохром“ целосно го запре производствениот процес на 2 ноември 2016 година, со што околу 800 вработени останаа без работа. Раководството на комбинатот одлучи да ја спроведе одлуката на Испекторатот за животна средина за затворање на фабриката поради непочитување на крајниот рок за изградба на филтер станица кој истече на 30 октомври 2016 година. Вработените во „Југохром“ потоа неколкупати протестираа барајќи решавање на нивниот проблем.