Францускиот претседател Емануел Макрон ги укори демонстрантите кои се судрија со полицијата во Париз за време на последните протести предизвикани од зголемувањето на цените на горивото.

-Срамно за оние што ги нападнаа безбедносните сили, срамно за оние кои беа насилни кон другите граѓани и новинари, објави Макрон денеска, откако последните демонстрации во главниот град станаа насилни.

Повеќе од 100.000 луѓе учествуваа на околу 1.600 протести низ Франција во еден ден, објави Министерството за внатрешни работи. Повеќето минаа мирно, освен во Париз каде се собраа 8.000 демонстранти.

На Шанзелизе, полицијата употреби солзавец и водени топови за да ги растера демонстрантите, познати како “жолти елеци”.

Се наведува дека во насилствата биле повредени повеќемина, меѓу кои и четворица полицајци. Четириесет се уапсени. Демонстрантите првично се фокусираа на изразувањето незадоволство од зголемувањето на давачките за горивата, но протестите подоцна прераснаа во незадоволството поради зголемените трошоци за живот и од други мерки од политиката на Макрон.