Францускиот претседател Емануел Макрон вчера остро ја отфрли идејата дека се можни нови преговори за Парискиот договор за климатски промени и рече дека одлуката на американскиот претседател Доналд Трамп да се повлече од него ќе биде на штета на американските граѓани и на интересите.
Макрон кој имаше телевизиско обраќање на француски и на англиски јазик, рече дека Трамп „направил грешка на штета на интересите на неговата земја, неговиот народ и грешка за иднината на нашата Планета“.
-Вечерва ви кажувам одлучно: Нема да отвориме нови преговори за помалку обврзувачки договор. Нема шанса, рече Макрон кој ја презеде претседателската функција пред помалку од еден месец.
Пораката од Макрон е поостра во споредба со коментарите по средбата со Трамп на самитот Г-7 на Сицилија минатата недела, кога тој изрази надеж дека Трамп ќе покаже прагматизам што ќе му помогне да остане во Договорот.
Во меѓувреме повеќе градови во САД му откажаа послушност на Трамп ветија дека ќе го почитуваат Парискиот договор и покрај повлекувањето.
Градоначалникот на Њујорк Бил де Бласио вчера изјави дека неговиот град ќе ги преземе работите во свои раце, нарекувајќи го повлекувањето од историскиот договор „опасност чија цел е срцето на Њујорк“.
Тој рече дека планира да потпише извршна наредба до крајот на неделава со кое ќе ја изрази определбата на градот дека останува зад овој Договор. Де Блазио е еден од градоначалниците на 71 американски град, кои го потпишаа отвореното писмо до Трамп во ноември лани веднаш по неговиот избор, за да остане во Договорот.
Неколку градови синоќа беа осветлени во зелена боја, во знак на поддршка на Договорот.
И додека светот крева глас против оваа “неодговорна” одлука на Трамп, климатските експерти тврдат дека станува збор за пропаганда на Трамп наменета за неговиот електорат. И дека излегувањето од Парискиот договор не може да оди така лесно како што ветува Трамп.
Имено, напуштањето на Парискиот договор е процес кој трае 4 години. Тој стапи на сила на 4 ноември 2016 година што значи дека САД можат да излезат од договорот најрано на 4 ноември 2020 година, точно кога се одржуваат следните претседателски избори.
Светот верува дека Трамп нема да добие нов мандат од Американците и дека договорот ќе биде спасен во последен момент.