Американскиот претседател Доналд Трамп соопшти дека САД се повлекуваат од Парискиот договор за климатските промени.
-Со цел да ја исполнам мојата света должност да ја заштитам Америка и нејзините граѓани, САД ќе се повлечат од Парискиот климатски договор, изјави Трамп, соопштувајќи ја одлуката во попладнево во Роуз гарден во Белата куќа.
Тој рече дека САД се подготвени да почнат преговори за повторно потпишување на Парискиот или на некој друг климатски договор,но „под услови што се фер за САД“.
Објаснувајќи ја својата одлука Трамп рече дека спроведувањето на договорот ќе ги чинеше САД трилиони долари и стотици илјади загубени индустриски работни места, со масивни намалувања на производството на хартија, цемент, железо и челик, јаглен и природен гас.
-Почнувајќи од денес, САД ќе престанат со спроведувањето“ на париската спогодба и „драконскиот“ товар од неа, рече тој.
Договорен во 2015 година, Парискиот договор потпишан од речиси 200 држави во 2016 година, кој се смета за голем успех од неговиот претходник, Барак Обама. Негова цел е драстично да го намали јаглерод диоксидот и другите гасови од потрошувачката на фосилни горива, со цел да се забави глобалното затоплување. САД се заложија до 2025 година да ги намалат емисиите до 28 проценти од нивоата од 2005 година. Кина во моментов е најголем емитувач на јаглерод во светот, а САД се веднаш зад неа.
Канада, Европската Унија и Кина рекоа дека тие ќе ги почитуваат своите обврски кон договорот дури и ако САД се повлечат, објави Ројтерс.
Во средата градоначалникот на Бостон соопшти дека Меѓународниот климатски самит што требаше да се одржи во овој град следниот месец е откажан поради немање поддршка од федералната влада.
Над десет водечки светски корпорации – меѓу кои и Епл, Фејсбук, Гугл и Мајкрософт – вчера испратија писмо до Трамп во кое го повикуваат да остане во Парискиот договор и велат дека тој е од корист и за економијата и за животната средина.