Национален Собир на Марин Ле Пен го сруши рекордот на парламентарните избори во Франција вчера – освојувајќи 89 места што и дава на партијата невидена моќ во претстојното француско Собрание.
Со 89 пратеници, Ле Пен не само што политички воскресна по поразот од Макрон на претседателските избори туку и нејзината екстремно десничарска партија ќе стане парламентарна група за првпат по 1986 година.
„Народот избра да испрати многу моќна група пратеници од Националниот Собир во Собранието, убедливо најголем број во нашата политичка историја“, им рече синоќа радосната Ле Пен на поддржувачите и гласачите. Таа денес објави дека нема да го преземе кормилото на самата партија, со цел да остане фокусирана на нејзината улога како иден претседател на пратеничката група, каде што ќе седи како една од главните сили во опозицијата.
Екстремно десничарската партија на Ле Пен имаше само осум пратеници во последниот состав на францускиот долен дом бидејќи не го достигна прагот од 15 места што треба да го достигнат политичките партии за да формираат парламентарна група. Пратениците кои не се во пратеничка група добиваат помалку време за говор и помалку средства за своите активности. Сега како бројна пратеничка група, партијата на Ле Пен ќе добие и канцелариски простор и сали за состаноци.
Со 89 места, партијата на Ле Пен Национален Собир ќе може да покрене и гласање на доверба што може да се покаже ризично за владата на премиерката Елизабет Борн. Со освоените 89 места, екстремно десничарската партија го надминува и прагот од 60 пратеници потребни за барање до Уставниот суд за оценка на закони.
Партијата на Ле Пен, исто така, освои вистински џекпот, бидејќи француската држава им дава повеќе пари на партиите кои освојуваат повеќе гласови на изборите. Партијата ќе добива околу 10 милиони евра секоја година до 2027 година. На крајот на 2020 година, партијата имала долг од близу 24 милиони евра, според официјалниот извештај за транспарентност. (Политико)