Првиот тениски гренслем во сезоната без Енди Мареј. Британецот реши да не презема ризик и дополнително да ја влоши ситуацијата со повредениот колк, па нема да настапи на Австралија опен, турнир што го нема освоено ниту еднаш и покрај петте одиграни мечеви за титулата.
„За жал нема да играм во Мелбурн бидејќи сè уште не сум подготвен. Наскоро се враќам дома и добро ќе ги разгледам сите опции што ги имам. Благодарам за поддршката и се надевам дека наскоро ќе можам на терен“, напиша Мареј кој од истата причина го откажа учеството и во Бризбејн.
Мареј нема одиграно официјален меч од ланското четврт-финале на Вимблдон. Во меѓувреме имаше само два егзибициски настапа против Роџер Федерер во Глазгов и против Баутиста во Абу Даби.
Британецот за првпат го пропушта Австралија опен од 2005 година и нема да настапи на втор гренслем едноподруго по Ју-Ес опен во 2017 година.
„Јасно ни е дека Енди минува низ тежок период и дека стори се како би можел да заигра. Знаеме дека одлуката е тешка и мора да ја почитуваме. Тој е вистински шампион, еден од нашите омилени тенисери. Му посакуваме брза рехабилитација“, изјави директорот на Австралија опен, Грег Тили.
Од гренслемот во Мелбурн претходно се повлече и Јапонецот Кеи Нишикори. Сè уште се очекува конечно изјаснување од Серена Вилијамс, од Нова Ѓоковиќ и од Рафаел Надал.