Енди Мареј се подложи на нов хируршки зафат многу побрзо одошто и самиот најавуваше. Шкотскиот тенисер се јави на Инстаграм со фотографии во болнички кревет по вградување на метален дел во колкот и изрази надеж дека болките ќе исчезнат и квалитетот на животот ќе биде подобар, но малку е веројатно дека ќе може да продолжи со тениската кариера. Познавачите велат дека би можел повторно да заигра, но како учесник во дубл мечеви, а не и во сингл.
„Сега имам метален колк. Се чувствувам помалку разнишано ама се надевам дека ова ќе стави крај на моите болки“, напиша Мареј кој во мај ќе го прослави 32. роденден.
Мареј во 2018 година одигра само 15 меча пред повлекувањето во септември. Оваа година, пак, се појави на два турнира и двата ги заврши со порази во воведните кола. Загуби од Русинот Данил Медведев во Бризбејн и од Шпанецот Роберто Баутиста Агут во маратонски меч на Австралија опен. Некогашниот прв светски рекет моментно е на 225 место на АТП листата.