„ЕУ не е само правното приближување и хармонизација на македонското законодавство со европското, туку и реални проекти кои го прават поквалитетно секојдневното функционирање на граѓаните. ЕУ е синоним за подобар живот на граѓаните, кој преку својата финансиска поддршка е најголем донатор и помош за постигнување на европските стандарди и реформи“ рече вицепремиерот за европски прашања Бојан Маричиќ на трибината „МК во ЕУ до 2030“ во Куманово.
Тој додаде дека од седумте годишни европски финансиски програми во просек добиваме околу 620 милиони евра.
„На ова се надополнуваат инфраструктурните проекти, кои последните 2-3 години се во вредност од околу 300 милини евра од Инвестициската рамка за Западен Балкан. Од неодамна сме дел од заедничката енергетска политика на ЕУ – под европскиот чадор сме кога е во прашање обезбедувањето на енергија во услови на криза – токму затора, поради нашите сојузништва и поради нашите внимателни економски политики успешно ја поминавме зимата – со нормални сметки за струја, без покачувања, без рестрикции, без хаварии“ рече Маричиќ.
Вицепремиерот истакна дека ЕУ ја поддржува и нашата добрососедска прекугранична соработка и дека утре ќе биде потпишан договор со ЕУ за програмата за прекугранична соработка Северна Македонија – Србија во вредност од 8,4 милиони евра неповратни средства од ЕУ.
„И затоа одиме во ЕУ, заради можностите кои ги нуди за граѓаните, фондовите за проекти кои ги следат европските трендови и се во интерес на граѓаните и подобрување на нивното опкружување. Со добивањето пристап до единствениот пазар на ЕУ, на Северна Македонија ѝ се отвора можност да се наметне како европска зона со компаративна предност“ рече Маричиќ.