Вицепремиерот за европски прашања, Бојан Маричиќ, учествуваше на панел-дискусија посветена на проширувањето на ЕУ кон Западен Балкан, на која истакна дека е клучна политичка волја на Европската Унија за поинаков пристап и конкретни чекори кон Западен Балкан.
„Она што е важно за политичка волја на ЕУ е таа да е проследена со конкретни чекори, но и со конкретен план за зачленување на државите од Западен Балкан. Но, мора да се спојат двете политички волји, политичката волја за проширување од страна на Европската Унија и политичката волја за реформи од страна на државите од Западен Балкан“, рече Маричиќ.
Според него најважно е сега ЕУ да биде заедно со државите од Западен Балкан и да остане присутна во регионот, при што го поздрави и утрешниот самит на ЕУ-Западен Балкан во Тирана, велејќи дека тоа е позитивен сигнал сам по себе, по прв пат сите лидери на Европската Унија да дојдат во нашиот регион и да заседаваат негде надвор од Европската Унија, заедно со државите од Западен Балкан.
Маричиќ, посочи дека војната во Украина наметна ЕУ повторно да размислува за нејзината геостратешка позиција и цел, при што на маса се стави повторно концептот на Европската Унија како мировен и политички проект.
„ЕУ е мировен и политички проект. Инаку да не беше така немаше воопшто да дискутираме дали треба Украина да биде членка на Европската Унија или не, и останатите држави од тој регион“, истакна Маричиќ.
Маричиќ зборуваше и за сегашната перцепција на граѓаните од Западен Балкан за членството во ЕУ, дека е тешко достижно членството во Унијата и кажа дека борбата со таа перцепција може да ја добиеме само доколку има реформи.
„Тоа неопходно да се направи од наша страна, од страна на државите од Западен Балкан и сите влади, и тоа силни реформи, искрени и без импровизација, а од друга страна, за да тоа има ефект, и за да може да имаат навистина политичка тежина тие реформи, мора да има јасна политичка волја од страна на државите членки на ЕУ, исто така искрено и без импровизации, да дојдеме до точка на членство што побрзо“, потенцираше тој.
Вицепремиерот и главен преговарач со ЕУ денеска учествуваше на конференцијата: „Интензивирана соработката: заживениот Берлински процес и иднината на регионалниот Соработка во Југоисточна Европа“, организирана од Фондацијата Фридрих Еберт (ФЕС) и германската амбасада.