Хрватскиот фудбалски репрезентативец Лука Модриќ, кој ги собра сите можни награди во 2018 година, ќе остане во Реал Мадрид до 2021 година, пишува шпанска „Марка“. Весникот наведува дека двете страни постигнаа заеднички јазик за продолжување на соработката со што е ставен крај на шпекулациите за негов можен трансфер во Интер.
Врз основа на новиот договор, Модриќ ќе остане верен на актуелниот европски шампион до својата 36 година и планира да се пензионира на „Сантијаго Бернабеу“. Тој неколку пати во минатото изразуваше незадоволство бидејќи не му е понуден нов договор, управата на „кралскиот“ клуб летоска ги одби обидите на Интер да го привлече, па сега, конечно, дојде нов договор како награда за сиот негов придонес досега.
Модриќ лани ја предводеше Хрватска до финале на Светското првенство во Русија, а од пристигнување во Реал Мадрид од Тотенхем во 2012 година имаше голема улога во освојување на четирите трофеи во Лигата на шампиони.