Долгогодишниот шеф на кабинет на поранешниот премиер Никола Груевски, Мартин Протоѓер, од минатиот месец е вработен во ВМРО-ДПМНЕ, дознава НОВА ТВ. Од април годинава Протоѓер на платниот список на партијата им се придружи на екс министрите Гордана Јанкулоска и Миле Јанакиески, како и на поранешниот портпарол во МВР, Иво Котевски.

Протоѓер, кој важеше за десна рака на Груевски и во владата се смести уште од првиот ден од мандатот во 2006 година, го напушти техничкиот премиер Емил Димитриев и засолниште најде во белата палата на ВМРО-ДПМНЕ.

Поранешните министри Јанкулоска и Јанакиески кои си поднесоа оставки во мај 2015 година, до мај следната година биле на апанажа, а потоа се вработени во партијата. Јанкулоска во ВМРО-ДПМНЕ добива плата од 63.000 денари, а овој податок е јавен преку анкетниот лист на нејзиниот сопруг кој од пред неколку месеци беше именуван за директор на Инсекцискиот совет.

Според информациите на НОВА ТВ, од декември 2013 година до декември 2016 година, вработен во ВМРО-ДПМНЕ бил и Јохан Тарчулоски, кој на изборите на 11 декември беше избран за пратеник.

Протоѓер осомничен во „Титаник“ и „Талир“

Мартин Протоѓер беше на чело на изборниот штаб на ВМРО-ДПМНЕ за време на изборите во 2006, 2008, 2009 и во 2011 година. Три години беше и генерален секретар на партијата, но си поднесе оставка во 2011 една година пред официјално да му истече мандатот. Но остана вработен како шеф на кабинет во кабинетот на поранешниот премиер Никола Груевски, се до крајот.

Протоѓер е осомничен во два случаи кои ги отвори Специјалното јавно обвинителство, „Титаник“ за изборните нерегуларности и најновиот случај „Талир“ за перење на пари преку донациите на ВМРО-ДПМНЕ.