На 21 јули 2025 година, рускиот агресор изврши уште еден масивен воздушен напад врз цивилите и цивилните цели во Украина, со 426 беспилотни летала и 24 ракети во координиран ноќен напад. Нападите беа насочени кон повеќе градови, а Кијив, Харкив и Ивано-Франкивск се меѓу најтешко погодените, пренесува ЦивилМедиа.
Главниот град претрпе значителна штета. Беспилотно летало го погоди влезот на метро станицата Лукјанивска, која се користеше како засолниште, што е шести пат оваа станица да биде погодена од 2022 година. Пожари избувнаа во станбени згради, детска градинка и комерцијални области. Најмалку две лица беа убиени, а 15 повредени, вклучувајќи и 12-годишно дете.
Ивано-Франкивск кој се наоѓа во западниот дел на земјата го доживеа својот најтежок напад од почетокот на целосната воена агресија, што резултираше со повреди на четири лица, вклучувајќи и едно дете.
Харкив, вториот по големина град во Украина беше погоден 12 пати, при што беа предизвикани пожари и структурни оштетувања на цивилната инфраструктура.
Украинската амбасадорка Лариса Дир на социјалните мрежи истакна дека на Украина итно ѝ е потребно зајакнување на противвоздушната одбрана.
„Ден 1244. рф лансираше повеќе од 420 дронови и над 20 ракети, вклучително и балистички ракети. Нападот на Кијив траеше 8 часа. Заштита од масовни напади – производство на дронови-пресретнувачи. #StandWithUkraine #StopRussia“, напиша амбасадорката Дир на Х.
Нападот се совпадна со дискусиите на високо ниво на НАТО за воена поддршка за Украина. Американскиот претседател Доналд Трамп ѝ даде на Русија рок од 50 дена да се согласи на прекин на огнот или ќе се соочи со заострени санкции. Во меѓувреме, Европската унија го одобри својот 18-ти пакет санкции насочени кон финансискиот и енергетскиот сектор на Русија.
Џ. Д. / ЦивилМедиа