Десетици илјади луѓе се собраа во Будимпешта против новоизбраниот унгарски премиер Виктор Орбан. Демонстрантите го обвинуваат дека ја презел контролата врз медиумите и ги претворил во пропаганден инструмент.
Демонстрантите излегоа на улиците на унгарскиот главен град во саботата на вторите масовни антивладини протести откако премиерот Виктор Орбан освои убедлива победа на изборите на 8-ми април.
Демонстрантите извикуваа “Демократија” и носеа знамиња на Унгарија и Европската унија додека маршираа низ Будимпшета.
Тие го обвинија Орбан и неговата десничарска националистичка партија Фидес, која освои две третини од парламентарните места на изборите, дека ја презеле контролата врз државните медиуми и ги искористиле за победа на изборите.
Нивните критики ги потврдија и набљудувачите од ОБСЕ, кои изјавија дека во изборната кампања медиумите биле пристрасни кон владеачката партија.
Во следните неколку недели планирани се повеќе демонстрации и во градови, велат организаторите.
По неговата победа, Орбан ја засили кампањата против невладините организации поврзани со американскиот милијардер Џорџ Сорос, и го обвини дека сака да ја уништи Европа преку масовна имиграција. Парламентот наскоро ќе гласа за контроверзниот закон “Стоп Сорос” со кој се предвидува да се наметне данок од 25 проценти на странски донации за невладини организации.
Фондацијата Сорос во петокот објави дека ќе ја напушти Унгарија, ако се усвојат законите.