Енди Мареј и Новак Ѓоковиќ ќе водат борба за водечката позиција на АТП листата, но заедно со остаатите шест колеги ќе играат и за вносни парични награди на завршниот Мастерс турнир во Лондон што почнува во недела.
Секој триумф во групната фаза „тежи“ по 167.000 долари, поразениот во финалето ќе добие 510.000 долари, а на сметка на победникот ќе легнат трипати повеќе – 1.560.000 милиони долари. Математиката вели дека при освојување на титулата со три триумфи во групата може да се стигне до заработувачка од над два милиона долари. Награди се предвидени и за првите резерви на настанот во „О2 арена“. Само за појавување во Лондон, Белгиецот Давид Гофан и Шпанецот Роберто Баутиста Агут ќе добијат 95.000 долари.
Осумте најдобри тенисери во сезоната се поделени во две групи. Популарно наречената „Лендл група“ ја сочинуваат Новак Ѓоковиќ, Милош Раониќ, Гаел Монфис и Доминик Тим, во онаа другата, насловена како „Мекинро група“, ќе се натпреваруваат Енди Мареј, Кеи Нишикори, Стен Вавринка и Марин Чилиќ.