Домот на Лордовите (Гордниот дом од британскиот Парламент) го поддржа законот за Брегзит, со кој се овластува премиерката Тереза Меј да го започне процесот за “развод“ со ЕУ.
Членовите на Горниот дом со 274 гласа За, наспроти 118 Против гласаа да не се бара, повторно, поддршката на пратениците на владиниот закон, иако беа отфрлени двата амандамани на законот кои ги изгласаа лордовите.
Станува збор за гаранциите на владата дека државјаните на ЕУ кои се во Британија ќе може да останат во земјата, како и правото на Парламентот во Лондон, да побара формално одобрување на договорот што ќе го постигне владата по преговорите со Брисел.
Пред гласањето во Домот на лордовите, пратениците во Долниот дом уште еднаш го поддржаа законот.
Со ова, Меј може уште денеска да го покрене членот 50 од Лисабонскиот договор кој ги уредува односите на земјите членки со ЕУ.
Засега останува нејасно, дали процесот ќе биде покренат, пред или по одржувањето на специјалниот Самит на земјите членки на ЕУ на 25 март во Рим, во чест на одбележувањето на 60-годишнината од Римскиот договор од 1957 година и од создавањето на Европската економска заедница (ЕЕЗ), врз чии темели е формирана денешната ЕУ.