Според сенаторот Џон Меккејн, начинот на кој Трамп се однесува кон медиумите е начин на кој почнува диктаторското владеење на еден политичар.
Меккејн е инаку член на партијата која го поддржа Трамп во неговата кандидатура.
– Ги мразам медиумите. Тебе те мразам особено, му вели Меккејн на новинарот Чак Тод од Ен-Би-Си и потоа дополнува: Но факт е дека ни требате. Ни треба слобода на медиумите. Клучно е тоа.
Тој вели медиумите мора да бидат отворени за зачувување на демократијата.
– Ако сакате да ја зачувате демократијата каква што ја имаме, мора да имате слобода. Без неа, се плашам дека ќе ги загубиме индивидуалните слободи. Вака почнува диктаторството, вели Меккејн.
Републиканскиот кандидат за претседател во 2008 година, е постојан критичар на Трамп, особено за неговите ставови кон националната безбедност и надворешната политика.
– Ако се вратиме низ историјата, диктаторството започнува со тоа што ќе пробате да ги загушите медиумите, дополнува сенаторот.
Оваа реакција на Меккејн доаѓа по изјавите на Трамп дека одредени големи медиумски куќи се најголеми непријатели на американскиот народ.