Втор ден новинарите од весниците „Дневник“ и „Утрински весник“ кој се дел од групацијата МПМ штрајкуваат на своите работни места поради проблемот кој трае неколку месеци – неисплатени плати.
Љубиша Станковиќ, синдикален лидер во „Утрински“ вели штрајкот е изнуден од новинарите бидејќи и покрај тоа што постојано се обидуваат да стапат во контакт со раководството за да разговараат, тие се игнорирани.
– Преку штрајкот новинарите го покажуваат својот протест бидејќи сите наши обиди да се стапи во контакт со менаџментот и раководство за да се разговара за проблемите кои се наталожени со месеци наназад, се игнорирани перманентно. Ова е ситуација која е изннудена од нас. Минатиот петок последен пат доставивме писмено барање за средба за да се дискутира. Се уште не игнорираат и немаме никаков контакт со менаџментот, вели Станковиќ.
Тој потенцира дека воопшто не му се јасни плановите на сопственикот на МПМ, кој според Форбс е еден од најбогатите Македонци, за тоа што ќе се случи со новинарите кои работат во овие дневни весници.
Освен што ги игнорира, Станковиќ вели, менаџментот и манипулира со своите одговори кон новинарите, бидејќи раководството е во Македонија, а на новинарите им е укажувано дека се на пат.
Реагирајќи на информациите дека нивните колеги од весникот „Вест“ не се солидаризираат со штрајкот, Станковиќ вели тие немаат донесено формално правна одлука но се солидаризираат со новинарите од „Дневник“ и „Утрински Весник“.
Штрајкот последица на игнорирањето
На штрајкот кој започна вчера, претходеше предупредувачки протест на новинарите на кој не се појавија уредниците на весниците, односно Горан Петревски и Јасмина Миронски од „Вест“, Дарко Јаневски од „Дневник“, Соња Маџовска од „Утрински весник“ и Игор Ивановски од „Македонски спорт“.
На доцнењето на платите му претходеше и отпуштање на вработени, како и кратење на плати, а МПМ своите одлуки ги правдаше дека работи со загуба и опаднат тираж. Притоа компанијата не понуди доказ дека се намалуваат надоместоците и за менаџерскиот тим.
Самостојниот синдикат на новинари и медиумски работници на сите средби со раководството постојано предупредуваше дека паѓањето на тиражите не е последица на лошото работење на новинарите туку на менаџирањето кое го урна кредибилитетот на весниците кои беа лидери во индустријата на печатените медиуми.
Во меѓувреме, НОВА се обиде да добие реакција и од претседателот на новоформираниот синдикат кој што е составен од уредници и новинари од Курир, Сител, Република и ТВ Нова, Градимир Марковски, за ситуацијата со неговите колеги, но тој уште кога слушна за што станува збор, ни спушти слушалка.
Директор на МПМ е Јана Станисављева, а сопственици се Јордан Камчев, најбогатиот Македонец според магазинот „Форбс“, поранешниот кандидат за претседател на РМ, Срѓан Керим, и Јана Станисављева, која ја презема компанијата на Веселин Јевросимовиќ, српски бизнисмен.