„МојДДВ“ и „МојДДВ #МојаНаграда“ во духот на солидарноста се приклучуваат кон борбата против ковид-19. Дел од фондот #МојаНаграда ќе се насочи кон борбата против коронавирусот, така што дневните награди ќе се сведат на 10 извлекувања по 500 денари, додека месечните извлекувања по 100.000 за мај и јуни нема да се одржат. Граѓаните ќе можат и да донираат средства од својот поврат на ДДВ преку апликацијата МојДДВ.
Како што соопшти Министерството за финансии, фондот на наградната игра МојДДВ #МојаНаграда е намален за 4,4 милиони денари, средства кои ќе се вложат во ковид-19. Од почеток на мај до крајот на јуни ќе се доделуваат по 10 дневни награди од 500 денари преку #МојаНаграда, додека месечните извлекувања за 100.000 денари ќе запрат во мај и јуни. Со ова, наместо 12 извлекувања, ќе има 10 за повисоките парични награди.
Месечните извлекувања ќе продолжат од 4 јули, кога ќе се одржи петтото извлекување во кое ќе учествуваат сите валидни и недобитни сериски броеви од дневните извлекувања од скенираните фискални сметки за периодот од 1 април до 30 јуни. Втората премија од 3 милиони денари ќе се извлекува на крај од наградната игра на 19 декември.
Граѓаните преку апликацијата „МојДДВ“ ќе можат и да го донираат својот поврат на ДДВ за првото тримесечје од 2020 година за борбата против ковид-19. Преку опцијата „скенирам и донирам“, со која e надоградeна апликацијата „МојДДВ“, граѓаните ќе можат одберат дали сакаат да го донираат својот поврат од ДДВ за првото тримесечје од 2020 година. Изборот ќе може да го направат до 5 мај.
Граѓаните преку апликацијата имаат две опции на располагање – „да, го донирам мојот поврат на ДДВ” и ,,не, благодарам”. Оној кој потврдно ќе одговори на опцијата за донација, дава согласност за донирање на целиот износ кој треба да му биде вратен на трансакциска сметка и нема да има можност за отповикување на дадената согласност.
Корисникот кој ќе одговори негативно на прашањето, ќе има можност да го промени одговорот се додека е отворена опцијата за избор, а ако не го промени мислењето повратот ќе му биде исплатен на трансакциска сметка. Можноста за донирање, односно откажување од повратот за првото тримесечје е до 5 мај.
За првото тримесечје во 2020 граѓаните преку скенирање фискални сметки оствариле право на поврат од 5,59 милиони евра. Во овој период скенирани се 49,95 милиони фискални сметки.