Околу 100 службеници на ЦИА и членови на нивните семејства се наоѓаат меѓу околу 200-те американски граѓани кои страдаат од мистериозниот „Хавана синдром“, изјави вчера директорот на ЦИА, Вилијам Барнс.
Барнс, кого американскиот претседател Џо Бајден како прв дипломат од кариера го постави на челното место на разузнавачката служба, во интервју за Националното радио изјави дека ги засилил напорите на неговата агенција за утврдување на причините за синдромот што се манифестира преку мигрена и вртоглавица.
„Хавана синдромот“, со симптоми како вртоглавица, гадење, мигрена и пропусти во меморијата за првпат бил детектиран кај вработените во американската Амбасада на Куба во 2016 година. Барнс потсети дека американската Национална академија на науките во декември потврди дека веројатн теорија е дека синдромот е предизвикан од зраци на „насочена енергија“.
Постои „многу силна можност“ синдромот да е намерно предизвикан и дека Русија е можеби одговорна за тоа, рече Барнс, воздржувајќи се од конечни заклучоци додека не заврши истрагата.