Самокритичност од селекторот Благоја Милевски по вчерашниот шокантен пораз на младата фудбалска репрезентација на Македонија од Гибралтар во квалификациите за Европското првенство во Италија во 2019 година. Тоталниот аутсајдер во групата славеше против националниот тим што во јуни учествуваше на ЕП во Полска со 1:0 за историска прва победа на селекцијата од Пиринеите што е формирана пред само десет месеци. Милевски притоа упати и извинување до јавноста, навивачите и Фудбалската федерација на Македонија (ФФМ) за бламажата во Фаро, Португалија.
„Нема оправдување. Ова е срамен резултат и ја преземам одговорноста. Како предводник на младата репрезентација ги доживеав најсреќните моменти во мојата кариера, а синоќа и најтешките. Нема алиби ниту во неиграњето на Елиф Елмас ниту за многуте неискористени прилики. Едноставно моравме да најдеме начини да победиме. Јас го одредив составот и моја е одговорноста. Модерниот фудбал не трпи емоции и сурово бевме казнети. Мора да демонстрираме заедништво, да продолжиме сплотени и да не потценуваме противник“, истакна Милевски.
Покрај триумфот, младиот состав на Гибралтар против Македонија го постигна и премиерниот гол во официјален натпревар во неколкумесечното постоење. Првенецот беше дело на капитенот Грем Торилја во 64. минута.
Нареден ривал на Македонија во квалификациите за ЕП 2019 е Австрија на 14 ноември во Скопје.