Младата фудбалска репрезентација на Македонија е пред нова квалификациска авантура што сака да биде подеднакво убава и слатка како и претходната. Циклусот за наредното ЕП 2019 во Италија почнува во септември и во него ќе се влезе со нова, свежа, генерација желна за докажување и стари амбиции. Конкурентност во групата, сериозен пристап на тренинзите, максимално залагање на натпреварите, добра игра и, секако, позитивни резултати.
Селекторот Благоја Милевски објави список со 21 играч за гостувањето во Ерменија на 5 септември. Изборот го темелеше врз искуството од пријателскиот меч со Црна Гора и притоа упати јасна порака до сегашните, но и идни репрезентативци.
„Во принцип не сум човек што сака да менува. Критериумите за повик во репрезентацијата остануваат исти како и досега. Оние што се стандардни во своите клубови ќе добијат шанса за докажување и во националниот дрес. Ќе играме во тешка група со одлични селекции. Наша цел и обврска е вадење на максимум и да сториме се што е во рамки на нашите можности да победиме во секој натпревар за подигнување на рејтингот“, истакна Милевски при соопштување на одбраните за подготовки и пат во Ереван.
Вардаровиот напаѓач Петар Петковски, и покрај повредата, е сепак вметнат во составот со надеж дека неговото колено ќе биде навреме санирано и ќе биде оспособен за настап во квалификациската премиера. Затоа, пак, епизодата Ереван ја пропуштаат Стефан Јевтовски кој е без клуб и Доријан Бабунски и Калвин Н’Сонго кои немаат минутажа во своите клубови, а Н’Сонго, згора на тоа, има проблеми и со документацијата.
„Петковски е неизвесен поради повреденото колено, Јевтовски е без ангажман, Бабунски и Н’Сонго без минута. Се надевам дека ќе се снајдат во периодот што надоаѓа и ќе се вратат во репрезентацијата за мечевите во октомври. Што се однесува до Ерменија, тоа е селекција што е составена од двата најдобри тамошни клуба Пјуник и Банантс. Одлично се познаваат, одлично функционираат, играат брзо, динамично и агресивно и се одлично технички потковани. Нема да биде нималку лесно против нив“, додаде предводникот на националниот У21 тим.
Покрај Ерменија, ривали на Македонија во квалификациите за ЕП 2019 ќе бидат и Србија, Русија, Австрија и Гибралтар.
Список на фудбалери (У21) за мечот со Ерменија во квалификациите за ЕП 2о19 во Италија
Голмани
Филип Илиќ (Гандзасар/Ерменија)
Боби Целески (Македонија Ѓ.П.
Одбрана
Давид Атанаскоски (Академија Пандев)
Алекс Симовски (Акрополис/Шведска)
Костадин Чешмеџиев (Академија Пандев)
Алекса Амановиќ (Јавор/Србија)
Јован Попзлатанов (Пелистер)
Стефан Костов (Ренова)
Бесарт Кривањева (Шкупи)
Среден ред
Тихомир Костадинов (Ружемберок/Словачка)
Енур Тотре (Шкендија)
Давор Здравковски (АЕЛ Лимасол/Кипар)
Никола Кулески (Сиднеј/Австралија)
Дин Аломеровиќ (Фуенлабрада/Шпанија)
Кристијан Филиповски (Силекс)
Напад
Петар Петковски (Вардар)
Емил Абаз (Спартак/Србија)
Бобан Георгиев (Силекс)
Селмани Ремзифаик (Ујпешт/Унгарија)
Даниел Крезиќ (Одеволд/Шведска)
Демир Бенјамин (Скопје)