Младата фудбалска репрезентација на Македонија по вторпат му е доверена на Благоја Милевски. По испишаната историја во квалификациите за Европското првенство во 2017 година и пласманот на завршниот турнирот во Полска, тренерот со две титули со Вардар во 2013 година (првенство и Суперкуп), во обид за нов подвиг со надежите. Чест му е за укажаната доверба од Управниот одбор на Фудбалската федерација на Македонија, свесен е дека се наоѓа пред тешка мисија за која и самиот вели можеби најтешка во кариерата, но има верба и во играчите и во сопствениот рецепт и методи на работа.
„Благодарам за укажаната доверба. Со нетрпение ги чекам новите предизвици. Се наоѓам пред, веројатно, една од најтешките мисии во мојата кариера меѓутоа повик од репрезентација не се одбива. Верувам во момците, верувам дека поседуваме квалитет, верувам во мојата работа. Ако немам верба, немаше да прифатам ангажман“, вели старо-новиот кормилар кој во младата селекција го наследува Добринко Илиевски со кого, според интернет страницата на ФФМ, соработката била спогодбено раскината.
Циклусот на квалификации за Европското првенство во Унгарија и во Словенија во 2021 година ќе започнат во септември. Ривали на македонската репрезентација во групата 6 ќе бидат Шпанија, Израел, Црна Гора, Казахстан и Фарски Острови.