Пропадна уште еден обид за доближување на ставовите на партиските работни групи за предлог законот за јавно обвинителство. Последната што беше закажана за попладнево во Собранието, траеше околу половина час по што претставниците на ВМРО ДПМНЕ ја напуштија, откако не беше задоволено нивното барање за присуство и на дрќавниот јавен обвинител, Љубомир Јовески.
„Сметаме дека сме во еден временски теснец. До 12 февруари нема премногу денови. Изнесените забелешки на Јовески и би рекол остри критики од декември во 2019 година се премногу силни за да може тој како државен јавен онбинител да биде заобиколен на вакви важни средби на кои сите сакаме да дадеме одредена забелешка, предлог или амандман за еден сеопфатен и прифатлив текст за Обвинителство. На другата страна и предочивме дека сите наши конструктивни, но критички препораки, забелешки и амандман сакаме да ги доставиме во присуство на државниот јавен обвинител Љубомир Јовески, како човек којшто досега изразил најсериозна критика за овој предлог закон“, изјави Милошоски по средбата.
Потегот на опозициските претставници, според министерката за правда, Рената Дескоска, бил очекуван. Се согласивме, вели таа, за јавна дебата, но барање за присуство на Љубомир Јовески го оцени како неосновано.
„Избегаа од средбата. Од забелешки што ги истакна лидерот на ВМРО ДПМНЕ, Христијан Мицкоски, на површина излезе само една и дадоа два предлога. За јавна дебата се согласивме, но нивното барање за присуство на Љубомир Јовески е неосновано. Претходно побараа присуство на претставници на ЕУ и на САД, но не и на Јовески. Ова е нивно несериозно однесување и јасно е дека целта им е запирање на сите предмети од СЈО“, истакна Дескоска.
Министерката за правда истакна дека со останатите партии било договорена нова средба за истакнување на предлози и потенцира дека јавна дебата ќе има, а дел од неа ќе биде и Љубомир Јовески. Тој, нагласи Дескоска, е запознат со предлог законот за јавно обвинителство и барањето за негово присуство денеска е уште еден обид на ВМРО-ДПМНЕ за напуштање на преговорите.
„Ќе бараме двотретинско мнозинство, имаме поддршка од ДУИ додека конструктивност покажаа и независните пратеници од ВМРО-ДПМНЕ“, рече Дескоска.