Миротворците од Преспа- Зоран Заев и Алексис Ципрас, се запишаа во листингот на оваа Меѓународна награда на која се сместени и имињата на поранешниот чешки претседател Вацлав Хавел, на поранешниот германски канцелар Хелмут Кол, на Курт Масур-врвната диригентска палка, на екс хашката обвинителка Карла Дел Понте, екс Генералниот секретар на ООН, Кофи Анан, на екипажот на Меѓународната вселенска станица, на прибалтичките држави и многу други..
„За својата дипломатска умешност во спорот околу името Македонија, актуелниот премиер Зоран Заев и поранешниот на Грција, Алексис Ципрас се одликувани со Мировната награда на Вестфалија за 2020 година. Двајцата одликувани постигнаа спогодба во деценискиот спор околу името „Македонија“ со „врвна дипломатска вештина“. Без премиерот на Република Северна Македонија Зоран Заев и екс премиерот на Грција, Алексис Ципрас „спорот околу името уште долго немаше да има крај и кавгата меѓу соседите и натаму ќе го дестабилизираше целиот балкански регион“.
Ова беше дел од образложението кое пред година и пол го претстави Меѓународното жири на „Мировната награда на Вестфалија“ предводено од претседателот на Економското здружение на Вестфалија и Липе, Рајнхард Цинкан кое од 1998 година, се појавува како донатор на оваа престижна награда.
Поради пандемијата, церемонијата на доделувањето на наградата во градот Мунстер, се одложи за една година подоцна, односно за денеска, но тоа воопшто не ја наруши совршената организација на настанот која наликуваше како да се одвива по беспрекорно изработено филмско сценарио, на кое режисерите додале поприлично аристократска атмосфера, за да ја долови врвноста во име на која , се доделува ова признание-МИРОТ и ПРИЈАТЕЛСТВОТО.
Миротворците од Преспа- Зоран Заев и Алексис Ципрас, се запишаа во листингот на оваа Меѓународна награда на која се сместени и имињата на поранешниот чешки претседател Вацлав Хавел, на поранешниот германски канцелар Хелмут Кол, на Курт Масур-врвната диригентска палка, на екс хашката обвинителка Карла Дел Понте, екс Генералниот секретар на ООН, Кофи Анан, на екипажот на Меѓународната вселенска станица, на прибалтичките држави и многу други..
Наградата на двајцата лауреати им ја додели претседателот на Латвија, Егилс Левиц, како претставник на трите балтички земји кои оваа награда ја добија за 2019 година. А на свеченоста преку видео врска се обрати актуелниот премиер на Северна Рајна Вестфалија Армин Лашет, кој е и претендент во трката за иден канцелар на Германија.
Согласно традицијата при доделувањето на Меѓународната награда за мир на Вестфалија, градоначалник на Мунстер, Маркус Леве пред своите сограѓани ги претстави годинешните лауреати, поранешниот грчки премиер Алексис Ципрас и актуелниот на Северна Македонија, Зоран Заев.
-Им благодарам на граѓаните на Мунстер за топлиот дочек и за аплаузите, Европа добро ги препознава балканските иницијативи кои на светот му носат пријателство и мир, напиша на фејсбук премиерот Заев.
Наградата на Вестфалија за мир се доделува секои две години, почнувајќи од 1998 година. Одликувањето го одржува во живот споменот на Вестфалскиот мировен договор, склучен во 1648 година во Минстер и Оснабрик. Историскиот договор го запечати крајот на Триесетгодишната војна која траела од 1618 до 1648 година.
За Договорот од Преспа, премиерот на Северна Македонија и поранешниот премиер на Грција, лани ја добија и Хесенската награда за мир.
М. Трпческа