Претседателот на ВМРО ДПМНЕ Христијан Мицкоски зел 20 000 евра хонорар за неговиот ангажман како советник за енергетика на екс премиерите Никола Груевски и Емил Димитриев.
Мицкоски бил советник од април 2015 до октомври 2016. Во овој период, месечно му биле исплатувани по 68.000 денари или 1100 евра. Хонорар не добил за последните два месеци.
На последниот дуел со премиерот Заев, Мицкоски кажа дека работел про боно во Кабинетот на Груевски и на Димитриев.
Според СДСМ документите покажуваат дека Мицкоски не ја говорел вистината кога рекол дека додека советувал Никола Груевски не добивал пари.
„Додека граѓаните осиромашувале, додека се уништувала економијата и се трупале огромни долгови, Христијан Мицкоски ги чинел граѓаните 2 милиони денари„ пишува во соопштението од СДСМ.
Од партијата на Мицкоски велат дека „ова е обид на власта преку излитени и невистинити тези и тешки лаги и преку злоупотреба на информациите да се сокрие осиромашувањето на граѓаните и колективната кражба што ја прави на државата“.
Од ВМРО ДПМНЕ објавија Документ кој Мицкоски го склучил со Владата во октомври 2016 година кога е ангажиран како надворешен советник за енергетика. Договорот е за една година – до октомври 2017 година и и е без паричен надоместок. 
Овој Договор е склучен во октомври 2016 година кога Мицкоски е именуван за генерален директор на АД ЕЛЕМ.
Критики за големиот број на ангажирани советници беа упатени и кон новата Влада на Заев – тој има 56 советници и надворешни соработници.
По јавните прозивки зошто на премиерот му се потребни толку советници, од Владата изјавија дека сумата за плати е тројно помала од онаа што била издвојувана за советници во претходната Влада. Груевски имал 91 советници и надворешни соработници – за кои годишно се исплатувале по 1,73 милиони евра.