Ова е мој трет Илинден да зборувам за она што следи во месеците и годините што се пред нас како претседател на најголемата политичка партија, рече во денешното обраќање Христијан Мицкоски, претседател на ВМРО-ДПМНЕ по повод државниот празник 2 август – Илинден во струшкото село Ташмаруништа.
„Ќе започнам со „Ура“ за „Афтономна Македонија“ бидејќи тоа се зборови од Крушевскиот манифест кој е своевидното евангелие на македонското револуционерно дело. Тоа е носечкиот код врз кој почива оваа македонска држава и од тогаш до денес, секоја година на „Свети Илија“ се празнува овој подвиг. И мене ми е особена чест што и оваа година сум во струшко Ташмаруништа заедно да го одбележиме најсветлиот празник за Македонија. Сто и седумнаесет години од Илинденското востание татни комитското „ура“ за слободна, независна и автономна Македонија и 76 години од вториот Илинден кој ја запечати желбата за слобода и ја круниса таа вековна епопеја на македонскиот народ за своја држава“, рече Мицкоски.
Илинденците и сето она за што се бореа, подвлече лидерот на опозициската партија, е нашата света кауза поради која и постои ВМРО. Ова не се само обични букви, тоа е кодот на Македонецот преточен во букви со историска големина и ако некој мисли дека ВМРО припаѓа само на една историска генерација, потенцира тој, треба да знае дека, пред сè, тоа му припаѓа на народот, на жените и на мажите, на старите и на младите, на православните, на католиците, на муслиманите, на евреите и така ќе остане.
„Супстратот на ВМРО секогаш биле западните идеи и кога многумина во 19. век зборувале за монархии, цареви и кралеви, ВМРО се формираше со идеја за „Република“ и поради борба за слобода. Токму таа борба го калеше жезолот на слободата во која се вградени најголемите јунаци на оваа земја и затоа нашата слобода денес не е подарена туку тешко спечалена“, говореше лидерот на ВМРО-ДПМНЕ.
Нашата борба за слобода има константа, рече меѓу другото, се крена Илинденското востание, а потоа продолжија партизаните, како продолжение на сите претходни стремежи за слобода и создавање на држава.
„Сето ова е обврска која нè задолжува да ја одбраниме слободата секогаш кога таа ќе биде нападната. И знам дека и денес исто како и во тоа време има неправди, удари, подмолни струи кои треба да нè обесхрабрат, втурнат во апатија, да се откажеме. Но, секој треба да знае дека овој ден денес го славиме не затоа што илинденците се откажале, туку затоа што се бореле. А борбата за Македонија е вечна, исто како и идеалот за неа“, истакна Мицкоски.
Илинден е огнот на страствената битка за правдини и тој е резултат на многу илиндени претходно, многу востанија и битки, потенцира меѓу другото Мицкоски и додаде дека нашата држава повторно ќе се исправи, главата горе, стаменито и гордо продолжуваме низ нови премрежја и битки за нашата заедничка среќа.