ВМРО-ДПМНЕ има план, има желба, што поконретна и поконструктивна соработка да имаме со Села, Ахмети и вклучително сите политички партии од албанскиот електорат, изјави лидерот на опозициската ВМРО ДПМНЕ Христијан Мицкоски во синоќешното интервју во емисијата „Отворено“ на ТВ 24, каде одговараше на прашања на новинари од различни медиуми.
-Ако ние имаме програма која би била интерес на граѓаните, а за истата би се сложиле, тогаш јас немам никакви предрасуди за да имам соработка со било кој од нив, рече Мицкоски, одговарајќи на прашањето за евентуална идна соработка со албанските политичари.
На прашањето, дали се сретнал со Љубчо Георгиевски и дали има простор за соработка меѓу нив двајца, новоизбраниот Претседател на ВМРО-ДПМНЕ рече дека не се сретнал со екс лидерот на ВМРО ДПМНЕ неколку месеци, но дека “сите оние луѓе кои се добронамерници се добредојдени…во борбата против штетните политики на оваа власт“.
Во врска со актуелните прашања, како што се преговорите за решавање на спорот за името и законот за јазиците, Мицкоски ги повтори познатите ставови на неговата партија: дека не поддржуваат промена на Уставот и дека законот е противуставен.
Тој рече дека неговата партија нема да поддржи промена на Уставот со цел промена на уставното име ниту, пак, ќе поддржи недостоинствено решение за спорот со името. А доколку дојде до взаемно прифатливо решение, тоа треба да биде ставено на референдум. Сепак, Мицкоски не одговори кое решение е прифатливо за неговата партија.
-ВМРО-ДПМНЕ нема да дозволи да биде изговор за неуспех на некого бидејќи секој оној кој што самиот, како што знаат старите да кажат “си ја подготвил чорбата, треба да си ја срка“. Ниту ние ќе дозволиме да бидеме оправдување за неуспехот на некого, ниту пак ќе бидеме дел од решение кое што нема да одговори на интересите на Република Македонија, рече Мицкоски.
Мицкоски потенцираше дека причината поради која поднеле голем број на амандмани е поради тоа што биле брутално одбивани од страна на Владата на СДСМ да формираат работни групи. Тој уште еднаш побара од владејачкото мнозинство да го повлечат законот и да седнат на маса се со цел да се подобри законот и да се направи применлив за сите.
– Ги повикавме владејачките коалициони партнери да формираме работна група која што ќе ја сочинуваат сите парламентарни партии, каде што ќе повикаме експерти, претставници од македонската академија на науките и уметностите, претставник од кабинетот на претседателот на државата, додаде тој.
Тој ја критикуваше Владата во врска со реформите, според кого за девет месеци Владата реализирала „очајно ниски“ 42% од планот 3-6-9 за пристап во ЕУ.