Лидерот на ВМРО-ДПМНЕ Христијан Мицкоски, потврди дека пред да се гласа за изборот на ДИК, опозицијата бара најпрво да се донесат законите  за финансирање на партиите и за Влада. Според Мицковски, финансирањето на партиите и техничката Влада биле договорени уште во март.

„Не смееме да го гледаме прашањето на ДИК како издвоено прашање, напротив прашањето на избор на ДИК мора да се гледа како целина со претходните закони кои што опозицијата заедно со Владата ги донесоа, а тоа се оние реформски закони кои што значеа позитивна препорака за отпочнување на преговори со Европската Унија. Во тој синџир кој што тогаш го договоривме беше носење на закон за финансирање на политичките партии, но исто така и формирање на техничка Влада 100 дена пред изборите, дури потоа доаѓа до комплетирање на ДИК“ кажа претседателот на ВМРО ДПМНЕ Христијан Мицкоски.

 

Премиерот Заев вчера порача дека барањето за техничка Влада е неприфатливо за СДСМ. Во Законот за Влада пишува дека премиерот ќе отстапи од својата функција 100 дена пред одржувањето на парламентарните избори и ние тоа го подржуваме рече Заев, но не и смени на други министри, како што бара ВМРО ДПМНЕ.

„Кога се формираше техничката Влада, во Пржино, опозицијата вети дека повеќе нема да ги објавува т.н „бомби“ и ќе ги достави до Специјалното јавно обвинителство. Тоа беше дел од договорот со кој Македонија почна да излегува од политичката криза. Не гледам потреба за тоа сега, но знам дека наша должност е да овозможиме нашите граѓани да се изјаснат на овој „историски“ референдум“ кажа Заев.

Блокирањето на изборот на Државната изборна комисија директно влијае и врз одржувањето на рефрендумот. Според Законот за референдум, Собранието треба да го распише референдумот 60 дена пред да се одржи. Ова значи дека доколку референдумот се планира да се одржи кон крајот на септември, тогаш најдоцна кон крајот на овој месец  пратениците да донесат одлука, а претседателот на Собранието да ја потпише одлуката за одржување на референдумот.

Претседателот на ВМРО ДПМНЕ Мицкоски денеска кажа дека „се додека не се распише референдумот, постојат многу веројатности, сите опции се отворени и да се случи и да не се случи.  Се до оној момент додека референдумот не биде распишан, додека не биде дефинирано референдумското прашање сите опции се отворени“. Според Мицкоски одговорноста дали ќе има или не референдум е кај власта која треба да ги прифати условите на  ВМРО ДПМНЕ и да покаже дека е за фер гласање.

„Реакцијата на опозицијата е само одговор на акцијата од страна на Владата. Тие се на потег, да видиме дали постои добра волја да се обезбедат фер и демократски услови за случување на еден референдум, а дури потоа кога ќе се случат предвремени или редовни парламентарни избори“рече Мицкоски.