Ова се избори на кои се бира помеѓу неправдата и криминалот, од една страна и правдата, чесноста, исправена и горда Македонија, од друга страна, изјави лидерот на ВМРО-ДПМНЕ, Христијан Мицкоски вечерва од Велес.
„Ова се избори кога одлучуваме за иднината на нашите семејства, избори на кои треба да го обелиме образот на нашите предци, изборот сега на 15 јули е помеѓу неправдата, омаловажувањето и од друга страна правдата и достоинството“, рече Мицкоски.
Тој посочи дека „овој пат треба да се обединиме и да видиме што можеме ние да направиме за Македонија.
„Затоа ве повикувам на 15 јули да гласате за број 14“, порача Мицкоски посочувајќи дека „не треба да им се верува на оние кои се колнат во жицата, во семето затоа што тие лажат“ и дека доаѓа време на политичари кои ќе одлучуваат заедно со народот.
Тој ги повика и политички неопределените и членовите на СДСМ кои не го поддржуваат сегашното раководство на партијата да застанат зад ВМРО-ДПМНЕ, со цел, како што рече, да се спаси државата.
Мицкоски најави бескомпромисна борба против криминалот и корупцијата, враќање на вредностите во општеството укажувајќи дека во програмата „Обнова на Македонија“ има детали како да се подобри животот на сите полиња и за сите.
„Сите кои се огрешиле пред законот ќе одговараат. Не може неправдата да царува, не може криминалците да бидат главни во општеството, а младите да заминуваат од Македонија“, порача Мицкоски.
Генералниот секретар на ВМРО-ДПМНЕ, Игор Јанушев и носител на листата на кандидати за пратеници во Изборната Единица 3 од Велес порача дека 15 јули е ден кога се гласа за чесни и вредни политичари и ден кога ќе се испратат во пензија сите политичари кои спроведуваат погубни политики за Македонија.
„На 15 јули е финалето на една битка за враќање на државата во рацете на народот. Три години гледавме како не треба да се работи како не треба да се води држава. Затоа овие избори се многу важни и треба да го поразиме вирусот на криминал и корупција, вирус кој има име и презиме Зоран Заев“, рече Јанушев.
Според него, оваа власт можела да направи многу повеќе за народот, но ништо не направила и „не мрднала со прст“.
„Ќе направиме и многу повеќе, ќе донесеме закон за потекло на имотот политичарите“, изјави Јанушев, најавувајќи ја програмата „Обнова“ за која рече дека „треба да даде ново светло во Република Македонија“.