Млади сили во партијата ВМРО-ДПМНЕ денеска ја најавија иницијативата за демократизација внатре во организацијата и повикаа членството да им се приклучи.
Се работи за долгогодишни членови на ВМРО-ДПМНЕ и млади сили кои на прес конференција упатија јавен повик за внатрешна демократизација, без притоа да прецизираат дали сметаат дека нивната партија е заробена од лидерот Никола Груевски.
Младите иницијатори за реформи упатија повик и кон сите стари членови кои беа исклучувани од ВМРО-ДПМНЕ да се вратат назад, за да го вратат угледот на ВМРО-ДПМНЕ за кој тие сметаат дека е нарушен и во домашната и меѓународната јавност.
– Зад иницијативата стојат над илјадници членови на ВМРО-ДПМНЕ. Републичкиот штаб за внатрешна демократизација на ВМРО-ДППМНЕ бара прв чекор да биде измена на Статутот. Решението на состојбите се наоѓа во партијата, и единствениот пат за враќање на власт е демократизацијата на ВМРО-ДПМНЕ. Ова не е обид за разнебитување на партијата , туку таа да се врати кај членовите. ВМРО-ДПМНЕ мора да стане најсилна партија и да се врати на власт, рече еден од иницијаторите Александар Михајлоскки, долгогодишен член на ВМРО-ДПМНЕ.
Тој повика никогаш повеќе да не се дојде до ситуација моќта во партијата да се централизира на едно место.
– Начинот на кој функционира ВМРО-ДПМНЕ мора да се смени, силата извира од членовите на ВМРО-ДПМНЕ. Ве повикуваме масовно да не поддржите за враќање на партијата во рацете на членовите. Оваа иницијатива не е за некого или против некого, ова е само за членовите на ВМРО-ДПМНЕ да можат демократски да ги избираат своите лидери, рече Михајлоски.
Тој во име на иницијаторите изрази надеж дека Никола Груевски ќе ја прифати оваа идеја за демократизација на партијата.
– Статутот на ВМРО-ДПМНЕ еволуирал низ годините, а во моментот статутот е целосно недомократски и ние сакаме да го смениме, во кој ќе биде определена одговорноста и задачите на сите партиски функционери, рече Михајловски и најави нови активности за што поголема мобилизација на членството.