Лицата што вчера беа сместени во Центарот за обука во Пепелиште – Криволак, во текот на денешниот ден ќе бидат преместени во реновираниот Завод во Демир Капија, соопшти Министерството за одбрна.
„Како што известивме вчера, Центарот за обука во Пепелиште е само привремен простор каде треба да се извршат епидемиолошките прегледи согласно медицинскиот протокол. Тимот на Министерството за здравство утрово ќе ги заврши прегледите по што веднаш лицата ќе бидат преместени“, се истакнува во соопштението.
Во Центарот за обука во Пепелиште-Криволак во текот на вчерашниот ден се сместија девет лица (музички оркетар од Битола) од групата од 200 македонски граѓани кои беа „заглавени“ на унгарско-српската граница и со асистенција на Романија и на Бугарија се спроведоа до граничниот премин „Деве Баир“ од каде влегоа во Македонија.
Вчеравечер со видео порака на социјалните мрежи, тие се пожалија дека се сами во објектот во кој, како што рекоа, нема никакви хигиенски услови и побараа нивна изолација во домашни услови.