Најавите за измени во составот на Милан за утрешниот реванш со Шкендија на „Телеком арена“ добија потврда во Скопје. Поради згуснатиот есенски распоред и битките на четири фронта што ги очекуваат „росонерите“ до крај на годината, нивниот менаџер Винченцо Монтела ќе поштеди дел од фудбалерите, дел, пак, воопшто не ги поведе на пат кон Македонија. На таквата негова улога во голема мера влијаеја убедливите 6:0 од првиот меч на „Сан Сиро“.
„Дојдовме со комбиниран состав и утревечер ќе направам некои измени во тимот. Но, тоа не значи дека го потценуваме противникот. До крајот на годината нè очекуваат многу средби. На секои три дена ќе имаме обврски, па затоа е неопходно да ротираме. Широкиот фонд на играчи што го имаме на располагање го овозможува тоа. И на нив им е потребна свежина и одмор. Да не заборавиме дека доаѓаат и репрезентативни активности“, рече Монтела на вечерашната прес-конференција во „Мериот“ каде отседна италијанскиот гигант.
Монтела истакна дека возвратните 90 минути на „Телеком арена“ се подеднакво важни за Милан како и воведните на „Сан Сиро“. Гостувањето во Скопје го оцени како важно од аспект на индивидуалниот и колективниот пристап во ситуација кога се има убедлива предност каква што „росонерите“ понесоа од Милано во Скопје.
„Секој натпревар е важен за нас. Исклучок не е ниту утрешниот кој ќе биде поинаков од првиот. Од една страна поради измените што ги планирам, а од друга страна и од желбата на Шкендија за поправање на впечатокот пред нејзина публика. Важна ни е Лигата на Европа како што ни е важна и Серија А. Имаме убедлива предност, се гледаме како учесници во групната фаза, но не е сеедно како ќе одиграме. Шкендија „согоре“ во желбата во Милано и не мислам дека разликата од шест гола е дотолку реална“, заклучи менаџерот на миланезите или популарното „авионче“, прекар што го доби за начинот на прослава на головите во дресот на Рома.
Милан во Скопје допатува без голманот Џ. Донарума, без дефанзивците Конти, Мусачо, Палета и Родригез, без играчите од средниот ред Бонавентура, Монтоливо, Билја, Соса и без напаѓачите Чалханоглу, Нианг и Калиниќ кој во текот на оваа недела се пресели во Милано како позајмен играч од Фиорентина.
Реваншот меѓу Шкендија и Милан е утревечер со почеток од 20,45 часот.
Состав на Милан за реваншот со Шкендија
Голмани: А. Донарума, Сторари, Гварноне
Одбрана: Абате, Антонели, Бонучи, Калабрија, Габиа, Гомез, Ромањоли, Запата
Среден ред: Кеси, Локатели, Маури, Тпраси, Занелато
Напад: Борини, Кутроне, Андре Силва, Сусо