Триумфот над Јувентус во италијанскиот Суперкуп за тренерот Винченцо Монтела е почеток на нова ера на Милан. „Росонерите“ во пенал рулетот беа подобри од шампионот на Италија со 4:3 за седми трофеј (толку има и „старата дама“) во натпреварот што по вторпат се одигра во Доха, Катар. Мечот во регуларниот дел заврши без победник (1:1). Џорџи Кјелини погоди за екипата од Торино, Џакомо Бонавентура за миланезите. Во ударите од 11 метри Манџукиќ ја погоди пречката, а Џанлуиџи Донарума го „прочита“ Паоло Дибала за голеа радост на „црвено-црните“ од „Сан Сиро и нивните фанови.
„Голем момент за нас. Момците се горди на себе и стореното. Добар сигнал е за добар старт. Овде би сакал да почнува нова ера на Милан, а овој трофеј е најдобар начин за такво нешто. Јувентус е многу силен клуб што доминира во Серија А во последните неколку години. Затоа сме среќни и задоволни што победивме еден таков ривал“, изјави легендарниот напаѓач на Рома, Винченцо Монтела под чие водство Милан го освои првиот трофеј по пауза од седум години.
Моментот го препознаа и искористија и фановите на „росонерите“. Се собраа во голем број на аеродромот во Милано рано утрово, околу 05.30 часот, и им приредија дочек на своите миленици.
„Мислам дека се организираа и дојдоа да нè дочекаат за да покажат колку се среќни и колку оваа победа и трофеј им значи. Впрочем со самото облекување на дресот на Милан очекувањата стануваат највисоки“, заклучи тренерот на Милан.