Жозе Мурињо пред неколку дена испорача верба дека Манчестер јунајтед ќе биде меѓу најдобрите четири екипи во Премиерлигата на крајот на 2018 година. Денеска, пак, по триумфот на гости против Бормут (2:1) изјави дека е тренер со најмногу среќа во англискиот фудбалски шампионат.
„Катастрофа бевме во првото полувреме. Игравме лошо, игравме ужасно во одбрана и можам да кажам дека имавме многу среќа. Со таков настап не можете да убедите луѓе дека нешто работите на тренинзи низ неделата. На полувреме помислив дека сум тренер со најмногу среќа во Премиерлигата бидејќи Борнмут требаше да води со 5:2 или 6:2“, истакна португалскиот менаџер на „црвени ѓаволи“.
Домашните поведоа во 11. минута со голот на Калум Вилсон по што следуваа два на гостите од „Олд трафорд“. Израмнувачкиот беше дело на Антони Марсијал во 35. минута, победничкиот, пак, го запиша Маркус Рашфорд во втората минута од екстра времето на натпреварот. Мурињо откри дека на паузата им порачал на фудбалерите „да заиграат подобро оти полошо од она што го покажале дотогаш не можеле“.
„Вториот дел беше поинаков од првиот. Создадовме многу шанси, бевме внимателни и агресивни. Не можам да поверувам колку лошо почнавме. Не бев на загревањето, но асистентите ми рекоа дека тоа било едно од најдобрите во сезоната. Фудбалерите мора да знаат дека мора да бидат стабилни кога ќе загубат топка. Ние стабилност не покажавме. Не можам да го сфатам тој менталитет поради кој ми побелува косата“, додаде „специјалниот“.
Манчестер јунајтед е седми на табелата со 20 бода колку што има и Борнмут и во наредното коло го очекува градското дерби со Сити на „Олд трафорд“.