Манчестер јунајтед имаше игра, а Арсенал среќа во дербито на 11 коло во Премиерлигата. Составот на Жозе Мурињо притискаше во целото прво полувреме, во ист ритам продолжи и во второто и таквиот пристап му донесе резултат во 68 минута. Мата погоди што се чинеше доволно за трите бода со оглед на анемичните „топчии“. Но, двете измени на Арсен Венгер, едното сериозно минување на противничката половина на гостите од Лондон што во гол го претвори Жиру беа талични за францускиот менаџер.
„Ова веројатно е најнесреќната екипа во Премиерлигата. Арсенал немаше никакви шанси, ние бевме подобри, дефанзивно одработивме одличен натпревар, но, за жал, тие ја искористија единствената шанса што ја имаа. Играме добро, немаме среќа“, коментираше Мурињо кој денеска не можеше да смета на Ибрахимовиќ.
Арсен Венгер призна дека неговот тим бил во подредена улога во најголем дел од средбата.
„Добро се држевме во првото полувреме. Нè притиснаа во второто и заслужено поведоа. Меѓутоа се повлекоа, па ние успеавме да израмниме. Тимскиот дух оваа сезона е феноменален“, истакна Венгер кој со Мурињо „ладно“ се ракуваа во натпреварот, момент што го обиколи светот.