Министерството за внатрешни работи во моментов истражува што се случило и како дошло до избувнувањето на пожарот во Министерството за правда, во кој целосно изгореа канцеларии на четвртиот кат, изјави денеска владиниот портпарол, Миле Бошњаковски.
Тој истакна дека неколку канцерарии се целосно уништени од пожарот, но, како што рече, допрва ќе се утврди до кој степен е направена штетата на одредени материјали.
– На четвртиот кат каде е најголемото оштетување се наоѓа дел од документација за меѓународна правна помош, Одделението за меѓународна правна помош, дел од сметководство и дел од секторот за финанисии на Министерство за правда, рече Бошњаковски на денешната прес-конференција Бошњаковски.
Добро е, додаде тој, што нема повредени лица и жртви. Брзата реакција на надлежните, рече, спречила ширење на пожарот на околните згради и објекти.
Пожарот во Министерството за првда избувна вчера попладнето, а бил пријавен во 16.47 часот. Во гаснење на пожарот интервенирале 10 возила со 25 пожарникари.
Ѕвонко Томевски, командирот на Противпожарна бригада на град Скопје вчера изјави дека во пожарот изгореле три канцеларии на четвртиот кат, но оти од големата топлина имало оштетување и на околните простории.
Заменик-министерот за правда, Оливер Ристовски, кој бил присутен во зградата, рече дека алармот се запалил во 16 часот и 30 минути и веднаш е почната евакуација на лицата кој биле присутни во зградата.
– Немаше многу од вработените. Јас бев на 5. кат и ние последни слеговме. Пожарот избувнал на 4. кат. Што е причината се уште не знаеме. Нема човечки жртви, немаше луѓе во моментот кога веќе беше многу критична состојбата во зградата. Не знам точно што е сега опожарено на четвртиот кат. Тука се финансии, сметководство, не знаеме точно каква е штетата, изјави вчера Ристовски.