Одделот за внатрешна контрола на МВР против 11 полициски службеници од СВР Скопје и против четворица припадници на Единицата за брзо распоредување поведе дисциплинска постапка и им врачи решенија за времено оддалечување од работните места. Решение за времено оддалечување од работното место му е врачено и на висок старешина во МВР, информираа од Министерството.
Решенијата се донесени во врска со работата на полицајците додека траеше насилниот упад во Собранието на 27 април.
Како што соопштија од МВР, внатрешната контрола констатирала дека полициските службеници пасивно ја набљудувале масата на граѓани која се обидувала да влезе во поголем број во Собранието и не преземале никакви дејствија со кои би им помогнале на другите полициски службеници.
„По насилното влегување на масата во Собранието овие полициски службеници продолжиле пасивно да се однесуваат во холот и на скалите и не преземале никакви службени дејствија со што овозможиле на масата непречено да се движи во Собранието. Врз основа на констатираната состојба, Одделот за внатрешна контрола утврди дека во конкретниот случај овие полициски службеници не примениле мерки од овластувањата со што постапиле спротивно на Законот за полиција, Правилникот за начинот на вршење на полициските работи, Упатството за начинот на однесување и меѓусебни односи на полициските службеници и спротивно на Кодексот на полициската етика“, пишува во соопштението на МВР.