На вакциналните пунктови во државата, заклучно со вчера, се вакцинирани вкупно 428.081 граѓани. Прва доза на вакцина против ковид-19 во текот на вчерашниот ден примиле 6.413 граѓани, а вкупно се вакцинирале 9.335 граѓани. Досега во државата вкупно се аплицирани 676.620 дози вакцини, а ревакцинирани се 248.539 граѓани.
Вакцинацијата, како што посочуваат од Министерството за здравство (МЗ), се одвива непречено на сите пунктови низ државата, а интересот за имунизација секојдневно се зголемува.
Со последните бројки, 56 проценти од населението над 70 години, 53 отсто од населението над 65 години и 49 отсто од населението над 60 години е вакцинирано со барем една доза на вакцина против коронавирусот.
– Голем е интересот за вакцинација без закажан термин. Со прва доза и без закажан термин се вакцинираат возрасни лица што сакаат да се вакцинираат, во пунктовите во Здравствените домови низ државата. Процесот на теренска вакцинација се одвива на територија на цела држава, со ротации на медицински екипи во секое село, рурално населено место, населба. Сајтот vakcinacija.mk е отворен за закажување на термини за вакцинација на децата. Ревакцинацијата се одвива во спортските сали низ градовите во Кавадарци, Куманово, Тетово, Штип, Битола, Струмица, Охрид, Велес и Прилеп и во А1 СЦ Борис Трајковски во Скопје, наведуваат од МЗ.
Министерството за здравство апелира до граѓаните да се вклучат во масовното вакцинирање бидејќи, како што посочуваат, само на овој начин ќе успееме да го победиме вирусот.