Леванте и во наредната натпреварувачка сезона ќе биде дел од Примера. Клубот од предградието на Валенсија го обезбеди опстанокот на коло до крај на шпанското фудбалско првенство по денешниот гостински триумф над Џирона со 2:1. И тоа на крилја на Енис Барди. Македонскиот репрезентативец ги одигра сите 90 минути и негово дело беше победоносниот во 86. минута по асистенција на Хозе Кампања. Домашните поведоа во 60. минута преку Кристијан Стуани, две минути подоцна израмни Хозе Моралес.
За Барди ова е трет гол во сезоната во Примера. Погоди и во минатото коло во убедливата победа над Рајо Валјекано со 4:1, а во есенскиот дел реализира и против Хетафе.
https://www.youtube.com/watch?v=DFfBqmIsDdc
Џирона, пак, со денешниот пораз остана на 37 бода и се сели во Сегунда. Во последното коло ќе гостува кај екипата на Алавез, а Селта, која е прва над зоната за испаѓање со 40 бода, го дочекува Рајо Валјекано кој заедно со Уеска се нови второлигаши во Шпанија. Леванте во последната рунда ќе игра против Атлетико Мадрид пред своите фанови.
Покрај третиот патник во Сегунда, како дилема за последното коло останува и четвртиот патник во Лигата на шампиони. Во фотофиниш влегуваат Валенсија и Хетафе.
Екипата од „Месталја“ попладнево го совлада Алавез со 3:1, а Барселона, очекувано, славеше над Хетафе со 2:0.
Претпоследното коло донесе нова бламажа на Реал Мадрид. Реал Сосиедад триумфира над „кралевите“ со 3:1. Тимот на Зинедин Зидан поведе со голот на Брахим Диаз во шестата минута по што следуваше пресврт на стадионот „Аноета“. Фудбалерите на Сан Себастијан израмнија преку Микел Мерино во 26. минута, а до одморот не успеаја да реализираат пенал (Хозе Вилијан бешпе непрецизен од белата точка во 26. минута).
Реал Мадрид во финишот на првото полувреме остана без исклучениот Жезус Валјехо, па бројчаната предност на тревникот ја искористија домашните во вториот дел и со головите на Жозеба Залдуа во 57. минута и на Беренечеа Мугуруза во 67. минута дојдоа до три бода против угледните гости од главниот град.
Примера, 37 коло
Атлетик Билбао – Селта 3:1
Атлетико Мадрид – Севилја 1:1
Барселона – Хетафе 2:0
Бетис – Уеска 2:1
Џирона – Леванте 1:2
Легањес – Еспањол 0:2
Рајо Валјекано – Валјадолид 1:2
Реал Сосиедад – Реал Мадрид 3:1
Валенсија – Алавес 3:1
Вилјареал – Еибар 1:0
Табела: Барселона 86, Атетико Мадрид 75, Реал Мадрид 68, Валенсија 58, Хетафе 58, Севилја 56, Атлетик Билбао 53, Реал Сосиедад 50, Еспањол 50, Бетис 47, Алавес 47, Еибар 46, Легањес 45, Вилјареал 43, Леванте 43, Валјадолид 41, Селта 40, Џирона 37, Рајо Валјекано 31, Уеска 30.