Рафаел Надал вчера го „преслуша“ Чехот Јан Весели во осминафиналето на Вимблдон, во четврт-финалето го чека дуел со подобриот меѓу Хуан Мартин дел Потро и Жил Симон. Со оглед дека денешниот ден му е без натпреварувачки обврски во Лондон, Шпанецот откри како ќе го мине времето.
„Ќе тренирам еден час, ќе одработам третман со физиотерапевтот, вечерта ќе ја минам пред ТВ гледајќи фудбал“, рече Надал.
Вечерва од 20 часот е првото полуфинале на Светското првенство во Русија. На тревникот на стадионот „Крестовски“ во Санкт Петербург ќе играат Франција и Белгија, втората европска пресметка за мундијалско финале е утревечер во Москва меѓу Англија и Хрватска.
„Веројано ќе се опуштам малку низ дома. Ќе зготвам нешто за ручек. Планирам да гледам фудбал, потоа можеби и еден филм. И тоа е тоа. Опуштено“, истакна шпанскиот тенисер пред новинарите во Лондон.
Надал за првпат од 2011 година е четвртфиналист на Вимблдон. За разлика од минатите неколку години во кои неговите настапи беа лимитирани поради повреди, овојпат е целосно здрав, без проблеми и во топ форма што се гледа и низ резултатите во досегашните четири меча на најпознатата тениска трева во светот.
„Многу ми значи што стигнав до четврт-финале. Долг период не сум бил во оваа позиција. Но, и честопати сум бил во текот на кариерата, зарем не? – Сега не зборуваме за финале или за освојување на титулата, зборуваме за мене и за четврт-финалето што, секако, е позитивен резултат“, заврши Надал.
Пласман меѓу најдобрите осум на турнирот осигураа и првиот носител, Роџер Федерер како и Србинот Новак Ѓоковиќ.