Како што соопшти Самостојниот синдикат на новинари и медиумски работници (ССНМ), новинарите од „Утрински весник“, „Дневник“ и „Вест“ ќе го зголемат штрајкот на шест работни часа.
Александра Спасеска, претседателка на штрајкувачки одбор на редакцијата „Вест“, вели весникот на 21.февруари ќе го издаде 5.000 број и жално е што новинарите ќе го изработуваат од позиција на штрајк.
– Утре на 21 февруари ќе излезе 5.000 број на дневниот весник „Вест“. Жално е што редакцијата ќе го подготвува ова јубилејно издание од позиција на штрајк. Во претходните денови наместо разговор за решавање на проблемите се засилија притисоците врз медиумските работници со телефонски јавувања и закани со отпуштања и казнувања, изјави таа.
Новинарите од МПМ со поддршка на ССНМ велат, ќе ги контактираат релевантните меѓународни институции за да ги информираат за заканите со кои се соочуваат.
Тие воедно продолжуваат да ги изработуваат весниците, бидејќи сметаат дека тоа им го должат на читателите.
На денешниот штрајк, поддршка дадоа и неколку претставници на Независниот полициски синдикат, а се очекува во следните денови да се приклучат и некои од синдикатите кои беа избркани од Сојузот на синдакати, односно претседателот Живко Митревски.
Останува нејасно колку е подготвен менаџментот на МПМ да го реши проблемот со новинарите и медиумските работници во весниците, ако се знае дека досега никого не повикале на средба, а сопственикот Срѓан Керим нема разговарано со ниту еден од новинарите или синдикалните претставници.
Керим важи за единствен сопственик на МПМ откако „Орка Холдинг“ неодамна соопшти дека ги продала своите удели во Медиа Принт Македонија.