Пресудата на обвинетиот Панче Ангелов за нападот врз актуелната министерка за одбрана, Радмила Шеќеринска на 27.април при упадот во Собранието, ќе биде изречена за една недела, откако тој на денешното судско рочиште се изјасни за виновен.
– Разбрав за што сум обвинет, се чувствувам виновен за кривичното дело. Го признавам во целост како што е напишано во обвинителниот акт. Се извинувам кон целата јавност за тоа грозомормно дело што го направив и им се извинувам на оштетените во оваа кривична постапка, изјави Ангелов на судењето.
Неговиот адвокат, Драган Пешевски, кој му беше доделен по службена должност, го замоли судот да му одреди пониска казна. Како олеснителна околност го наведе неговото признание, возраста, каењето, како и досегашната неосудуваност, додавајќи дека Ангелов кривичното дело го сторил во момент на афект.
Обвинителката во овој случај, побара Судот да го казни обвинетиот, но рече притоа да се ценат олеснителните, но и отежителните околности.
Признанието, како што вели обвинителката, може да ја спушти казната за 70 проценти, но исто така треба да се ценат и отежнителните околности, бидејќи без повод и причина на подмолен начин ја искористил немоќта на жртвата.
Според обвинението, тој бил во првата група која влегла во Собранието на 27.април и заедно со најсилните и најнасилните луѓе се упатил директно во прес-салата.
Најпрво му упатил закани на лидерот на СДСМ, Зоран Заев, потоа ја нападнал Шеќеринска, а фрлил и шише кон други пратеници. И двајцата се здобиле со тешки телесни повреди.
Панче Ангелов е познат во јавноста како човекот кој Шеќеринска, тогашна пратеничка, ја повлече за коса откако беше удрена со метален статив по глава.
За кривично дело насилство предвидена е казна затвор од три до 10 години.