Македонската машка одбојкарска репрезентација е четврти национален тим што ќе заигра на Европско првенство по кошаркарите, ракометарите и ватерполистите. Нејзин ривал попладнево (17.30 ч., МТВ 1, ТВ „Арена Спорт 2“) во арената „Стожице“ во Љубљана ќе биде Финска во меч од првото коло во групата Ц во која ќе играат уште Турција – Русија (14.30 ч.) и Словенија – Белорусија (20.30 ч.).
Предводени од селекторот Никола Матијашевиќ од клупата и капитенот Никола Ѓоргиев на терен, популарните „спартанци“ имаат единствена желба – победа за историја во дебитантскиот настап на големите турнири. Во таа насока се реализираа и двомесечните подготовките, најпрво во Маврово, а потоа и во Скопје во комбинација со неколку контролни средби (по две со Шведска и со Австрија и по една со Украина и со Бугарија на турнирот „Бранко Хаџииљоски Чајка“) со цел што повоиграно да се влезе на ЕП.
„Првиот меч на Европското првенство за нас е како финале пред финале. Мечот со Финска ќе ги покаже нашите перформанси и можности во Љубљана. Како дебитанти, треба да одиграме без никаков притисок, но успешно минавме низ квалификациите и заслуживме да сме овде. Мора често да бидеме на европско ниво и само така може да размислуваме на пласман во нокаут фазата“, порача капитенот Никола Ѓоргиев од Љубљана.
Матијашевиќ во Словенија поведе 14 одбојкари, 14 „спартанци“ кои засекогаш ќе бидат запишани во историјата на македонската одбојка и спорт. Националните бои на ЕП ќе ги бранат: Дарко Ангеловски, Ѓорѓи Ѓоргиев, Ристо Николов, Никола Ѓоргиев, Владо Милев, Славе Наков, Александар Љафтов, Александар Милков, Филип Деспотовски, Филип Николовски, Иван Андонов, Филип Маџунков, Стојан Илиев и Васе Михаилов.
Натпревари на Европското првенство, покрај во Словенија, ќе се играат и во Франција, во Белгија и во Холандија. Титулата на турнирот, што ќе се пренесува во 150 држави во светот, ја брани Русија.
ЕП во одбојка (м)
Група А (Франција)
Бугарија – Грција (14.15 ч.)
Португалија – Италија (17.15 ч.)
Франција – Романија (20.45 ч.)
Група Б (Белгија)
Србија – Германија (15 ч.)
Словачка – Шпанија (17.30 ч.)
Белгија – Австрија (20.30 ч.)
Група Ц (Словенија)
Турција – Русија (14.30 ч.)
Финска – С. Македонија (17.30 ч., МТВ 1, ТВ „Арена Спорт 2“)
Словенија – Белорусија (20.30 ч.)
Група Д (Холандија)
Чешка – Украина (14 ч.)
Естонија – Полска (17 ч.)
Холандија – Црна Гора (20 ч.)