Девизниот курс на денарот е стабилен и нема промени во неговото ниво, нагласува Народната банка по објавите во некои медиуми и на социјалните мрежи во кои се коментираат девизните курсеви на онлајн платформи. Народна банка апелира на совесно и одговорно информирање и проверка на вистинитоста на изворите на информации бидејќи секое произволно толкување на информациите во врска со домашната валута може да креира негативни ефекти врз домашната економија.
„Апелираме онлајн-платформите да не се користат како релевантен извор на информации и нивното прикажување на виртуелни пресметковни курсеви да не се смета за релевантен податок. Овие платформи не ја прикажуваат вредноста по која странските валути се купуваат на домашниот пазар, односно кај банките и менувачниците“, нагласуваат од Народна банка.
Оттаму посочуваат дека единствен релевантен извор на информации, според кој населението и фирмите може да го следат девизниот курс на домашната валута, е курсната листа што ја објавува централната банка на својата интернет страница www.nbrm.mk.
„На курсната листа што е со важност во моментот, средниот курс на еврото изнесува 61,69 денари“, посочуваат од Народна банка и додаваат дека располагаат со низа инструменти со кои гарантираат оти девизниот курс на денарот во однос на еврото ќе остане стабилен, а нивото на девизните резерви е, речиси, двојно повисоко од пред глобалната економска криза во 2008 година.