Министрите за одбрана од 17 земји-членки на НАТО денеска се согласија да формираат фонд за развој на нови технологии до јуни во 2022 година. Фондот за иновации со најмалку една милијарда евра ќе инвестира во технологии што би можеле да се користат за одбрана и безбедност.

Заедно ќе осигураме безбедност за нашите народи во светот што брзо се менува, изјави генералниот секретар на НАТО, Јенс Столтенберг по дводневниот министерски состанок во Брисел.

Пример за таква технологија е хиперсоничната пропулзија што, исто така, ја развиваат Кина и Русија, како и автономните авиони и другите роботски системи.

Претходно оваа недела, министрите се согласија за нов одбранбен план против различните видови на напади од Русија, која денеска соопшти дека покажала оти е во право кога ги прекинала контактите со НАТО.

Русија пред неколку дена ги затвори своите мисии на НАТО во Брисел и во Москва, откако Алијансата протера девет Руси кои ги осомничи за шпионажа.