Нè избркаа како кучиња, обвинуваат стотината вработени во штипска „Баргала“ кои пред неколку дена добија отказни решенија од компанијата со образложението дека го прекршиле работниот ред и дисциплина. Тие негираат такво нешто и сметаат дека неосновано им е прекинат работниот однос за што денеска и поднесоа приговори во Сојузот на синдикати на Македонија (ССМ).
– Ме пуштија дома и ми рекоа дека ќе бидам на повик. Наместо тоа, добив отказ бидејќи на 16 јуни не сум била на работа, а на 11-ти бев. Ова не е вака само сега, вака е секогаш, обвинува Македонка Данева која ја делат четири месеци до пензија.
Според ССМ, отказите во „Баргала“ се поделени на незаконски начин и од таму најавуваат дека со случајот во штипската фабрика за чевли ќе се позанимава и Јавното Обвинителство.
– Од страна на претпоставените на луѓето им било кажано да не доаѓаат на работа се додека не бидат повикани. Во конкретниот случај се работи за класична измама. Вчера поднесовме пријава до Државниот трудов инспекторат, а сега подготвувавме материјали да поднесеме пријава до Јавното обвинителство, нагласува Весна Кузманова Тодоровска.
Наум Барзов, менаџер на „Баргала“, вели дека отказите не се поврзани со протестот, а за ставот на синдикатот и на работниците не може да одговори, оти не ги знае деталите. Смета дека синдикатот не ја објаснил докрај правната постапка на работниците.
– Тие немаа најавено штрајк, туку организираа протест што е нивно законско право. Но, по протестот беа повикани да се вратат на работа. Работниците не го направија тоа и бидејќи три дена последователно не се јавија на работа, според Законот за работни односи им врачивме отказ, изјави Барзов за МИА.
Кристина Ампева од НВО „Гласен текстилец“ – Штип смета дека за овој случај мора да се смени и причината за отказ, бидејќи работниците вака ги губат сите права во случај на невработеност.
– Урнек во целата постапка треба да е пресудата на Основен суд – Штип, во која е наложено да се смени основот на отказот за една од двете работнички што пред неколку месеци добија отказ од „Баргала”, рече Ампева.